अफ्नो वक्तव्यलाई क्युनसेलले तोडमोड गरी छापेको भन्दै भूटानका प्रधानमन्त्री जिग्मे वाइ थिन्लेले गम्भीर असहमति प्रकट गरेका छन्।

प्र.म.थिन्लेले स्नातक विद्धार्थीहरूलाई सम्बोधन गर्ने एउटा सातौं ‘प्रेस मिट’ नामक औपचारिक कार्यक्रममा बोलेका कुरालाई क्युनसेलले गलत प्रस्तुति गरेको आरोप लगाएका छन्। ‘भूटानी जनतालाई पूर्ण रोजगारी’ दिलाउने भन्ने वाक्यलाई क्युनसेलले ‘शतप्रतिशतलाई रोजगार दिलाइने’ भनेर लेखिदिएको भन्दै प्र.म.ले असहमति जाहेर गरेका हुन्। ‘‘पूर्ण रोजगारी र शतप्रतिशत रोजगारी भन्ने अलग अलग कुरा हुन्’’, प्र.म.ले भनेका छन्। धेरै देशमा पाँच प्रतिशत रोजगारीलाई पूर्ण रोजगारी भन्ने गरिएको तर, भूटानमा बेरोजगारी दरलाई घटाएर २.५ प्रतिशतमा ल्याइपुर्याउनुलाई पूर्ण रोजगारी भन्न सकिने प्र.म. थिन्लेले बताएका छन्। प्र.म. थिन्लेले भूटान प्रसारण सेवाले समेत जनतालाई सत्य-तथ्य समाचार पुर्याउन नसकेको गुनासो गरेका छन्।

चाखलाग्दो कुरा त के छ भने, समाचार प्रसारण-प्रकाशनको यो गल्ती प्रधानमन्त्रीको जोंखामा दिइएको भाषणलाई अंग्रेजीमा अनुवाद गर्नेक्रममा भएको हो।

पुनर्वाश कार्यक्रमअन्तर्गत अमेरिकाको केन्टुकी राज्यस्थित लेक्सिङ्टन महानगरमा पुनर्स्थापित भूटानीहरूले ‘लेक्सिङटन भूटानी समाज’ स्थापना गरेका छन्।
केही दिनदेखि लगातारको छलफल र परामर्शपछि आएको निर्णयअनुसार २० जनाको केन्द्रिय समिति र ६ जनाको सल्लाहकार मण्डली रहने गरी शनिबार, अक्टोबर ९ को दिन सो सामाजिक संगठनको संरचनासहित औपचारिक घोषणा गरिएको छ। लिला मिश्र अध्यक्ष र शेखनाथ उप्रेती उपाध्यक्ष रहेका सो संगठनमा बुद्ध अधिकारी र खडानन्द खतिवडालाई कोषाध्यक्षमा चुनिएको थाहा भएको छ। नवगठित समाजका अध्यक्ष लिला मिश्रका अनुसार यस संगठनले सांस्कृतिक धरोहरको रक्षा, विभिन्न सामाजिक कृयाकलापको आयोजना तथा लेक्सिङटनमा रहेका भूटानीहरूको कल्याणखातिर समर्पित भएर काम गर्नेछ।
शनिबार गरिएको घोषणाको औपचारिक कार्यक्रममा लेक्सिङटनमा पुनर्स्थापित करिब २५ परिवारका प्रतिनिधिहरू उपस्थित थिए।

ढिलो गरी प्राप्त समाचारअनुसार अक्टोबर ०३, आइतबार राति क्यान्सास भूटानी समाजका सदस्य गोरे राईको हृदयघातका कारण मृत्यु भएको समाचार छ। शनिबार राति सकुशल सुतेका राईले आइतबार बिहान ११ बजेसम्म ढोका नखोलेपछि उनकी श्रीमतीले छिमेकीहरूलाई जानकारी गराएकी थिइन् । ‘‘मैले थाहा पाउने बित्तिकै ९११ मा फोन गरें, प्रहरी आएर ढोका फोरी हेर्दा दाजु त अघि नै बितिसकेछ, एम्बुलेन्समा आएको डाक्टरहरुले शवको अवस्था हेरेर हृदयघातका कारण मृत्यु भइसकेको भनेपछि प्रहरीले शव उठाएर लग्यो’’, मृतकका सहोदर भाइ ओम राईले भूटान समाचार सेवालाई बताए ।

भूटान, साम्ची जिल्लाको देन्छुखा ब्लकमा जनवरी ३१ सन् १९७७ मा जन्मिएका राई १९९०को दशकमा देश निकाला भएपछि भूटानी शरणार्थी शिविर बेलडाँगी-२ विस्तारितमा १७ वर्षलामो शरणार्थी जीवन भोगी यहीवर्ष गत मार्चमा तेस्रो देश पुनर्वाश प्रक्रियामा सामेल भई अमेरिकाको क्यान्सासमा पुनर्स्थापित भएका थिए । राई भूटानदेखि नै आंशिकरूपमा मानसिक रोगी भएको उनकी धर्मपत्नी, शान्ता राई  बताउँछिन् ।

अक्टोबर ०६ सन २०१०, बुधबार दिउँसो क्यान्सासमा शरणार्थी पुनर्वाश गराउने संस्था क्याथोलिक च्यारिटिज, स्थानीय सामाजिक संस्था मिसन एडिलाण्टे र क्यान्सास भूटानी समाजको सक्रियतामा मृतक राईको स्थानीय दाहसंस्कार केन्द्र हाइल्याण्ड पार्क सिमेटरीमा अन्तिम संस्कार सम्पन्न गरिएको क्यान्सास भूटानी समाजका अध्यक्ष हरि घिमिरेले भूटान समाचार सेवालाई जानकारी दिए ।

भोला सिवाकोटी/भूटान समाचार सेवाका लागि क्यान्सासबाट

शुक्रबार बेलुकी एउटा अज्ञात समूहले गोली प्रहार गर्दा  शनिश्चरे शिविरका बासिन्दा तारावीर कडरिया  सिकिस्त घाइते भएका छन् ।

शनिश्चरेस्थित भूटान समाचार सेवाका प्रतिनिधिले जनाएअनुसार गोलीको शिकार बनेर सिकिस्त अवस्थामा पुगेका कडरियालाई धरानस्थित बी.पी. कोइराला स्मृति प्रतिष्ठानमा उपचारार्थ लगिएको छ ।

यो समाचार तयार पार्दासम्म घटनाको सम्बन्धमा प्रहरीले कसैलाई पक्राउ गरेको छैन भने कुनै व्यक्ति वा समूहले घटनाको जिम्मेवारी पनि लिएको छैन ।

तेस्रो देश पुनर्वाश कार्यक्रमअन्तर्गत न्यूजिल्याण्डमा पुनर्स्थापित भूटानीहरूले न्यूजिल्याण्डको ४३ मोहेक एभिन्यू, पाल्मर्स्टन नर्थमा अक्टोबर १० मा समापन गर्ने गरी तीनदिने श्रीमद्भागवत पुराण वाचन कार्यक्रम शुरु गरेका छन्।

न्यूजिल्याण्डबाट डोमा काफ्लेले जनाए अनुसार सो पुराणको कथावाचन कार्यमा पण्डितहरू यादव भण्डारी, विष्णुभक्त अधिकारी र शास्त्री इन्द्र भण्डारी सक्रिय रहेका छन्। पाल्मर्स्टन नर्थका मेयर जोनो नेयलरद्वारा उद्घाटन गरिएको सो कार्यक्रमको दौरानमा पाल्मर्स्टन नर्थबाट निर्वाचित सांसद लेयन लीश ग्यालोयले समेत भ्रमणालोकन गरिसकेको जनाइएको छ।

भजन-कीर्तन, प्रवचन तथा कथावाचनको सिलसिला चलिरहेको सो कार्यक्रममा करिब दुई सय भूटानीहरूले उपस्थिति जनाएका बताइएको छ।

यसैबीच न्यूजिल्याण्डस्थित भूटानी समाजले विस्तारै भूटानी समुदाय विस्तारित भइरहेको पाल्मर्स्टन नर्थमा एउटा हिन्दू मन्दिरको आवश्यकताबारे न्यूजिल्याण्ड सरकारको ध्यानाकर्षण गराएको छ भने सरकारको तर्फबाट सकारात्मक प्रतिक्रिया आएको जनाइएको छ।

सेप्टेम्बर ५, मंगलबारको बिहान करिब आठ बजेतिर कोठाबाट काममा निस्केकी २९ वर्षीय राधिका अधिकारीलाई मिनीसोता राज्य, सेण्टपाल सिटी, युनिभरसिटी एभिन्यूको व्यस्त सडक काट्ने क्रममा एउटा कारले ठक्कर दिँदा सिकिस्त घाइते भएकी छन् ।
घरबाट बाहिर काममा निस्किएर सडक काट्ने क्रममा अधिकारीलाई पछाडिबाट कारले ठक्कर दिएपछि उनको देब्रे ढाड दोब्रिनका साथै पिठ्यूँमा गहिरो चोट लागेको थाहा भएको छ भने त्यसलाई सोझो पार्न इष्टिल-सरजरी गर्नुपर्ने राधिकाका भाइ शिव होमगाईंले जानकारी दिएका छन् ।
घटनापछि मिनीसोता राज्य पुलिसले पीडितलाई क्षेत्रीय अस्पतालमा पुर्याई औषधोपचार गरिरहेको कुरा परिवारलाई ११ बजेतिरमात्र थाहा भएको होमगाईंले बताए । ठक्कर दिने कारधनीबारे कसैलाई थाहा नभएको बताउँदै तत्काल खोज गरी उसलाई कडा कारबाहीका साथै पीडितको उपचारको व्यवस्था मिलाउन आग्रह गरेका छन् ।
अधिकारी परिवार करिब, एक वर्षअघि सन् २००९ को डिसम्बरमा अमेरिकाको मिनीसोतामा पुनर्वाश भएको हो । भुटानी शरणार्थी शिविर, टिमाईको सेक्टर डि-५, छाप्रा नं.५२बाट दुई छोराका साथ राधा र ३५ वर्षीय भीम अधिकारी लुथरन सोसल सर्भिसमार्फत पुर्नवाश भएका थिए । राधाले १३ सेक्टमबर २०१० का देखि नजिकैको शहरमा जागिर पाएकी थिइन् । घटनापछि उनका श्रीमान र परिवार पनि निराश भएका छन् ।
(मिनीसोताबाट अर्जुन प्रधान)