संयुक्त राष्ट्र संघीय शरणार्थीका लागि उच्चायुक्त (युएनएचसीआर) का डेपुटी कमिसनर टी. अलेक्सान्डरले अमेरिकाले भूटानी शरणार्थीहरुलाई पुनर्बास गराउने आफ्नो क्षमताका बारेमा प्रष्ट नपारेको बताएका छन् |
उनले उक्त कुरा शुक्रबार काठमाडौँमा युएनएचसीआरले आयोजना गरेको पत्रकार भेटघाट कार्यक्रममा बताएका हुन् |
“यस वर्ष युएनएचसीआरले करिव १५,००० भूटानी शरणार्थीहरु पुनर्बास गराउनेछ”, उनले भने | “अमेरिकाले केवल तीमध्ये ६०,००० मात्र स्विकार गर्नेछ भन्ने केही छैन | उसले पुनर्बास गर्ने आफ्नो क्षमताका बारेमा कुनै जानकारी दिएको छैन |
उनको भनाइअनुसार यदि शरणार्थीहरु इच्छुक भए लगभग सबैलाई पुनर्बसित गर्न सम्भव छ | उनले शरणार्थीलाई स्थानीय रुपमा नेपालमै व्यवस्थापन गर्ने सम्भावना नरहेको बताए |
“अहिलेसम्म यस सम्बन्धमा नेपाल सरकारसंग कुनै छलफल भएको छैन | तथापि हामी तीनैवटा विकल्पहरुलाई उतिकै सम्मान गर्छौं |”, अलेक्सान्डरले काठमाडौँमा पत्रकारहरुसंग भने |
उनले सुचारु तेश्रो देश पुनर्बास प्रक्रियालाई लिएर आफू सन्तुष्ट रहेको पनि उजागर गरे |
यसैबीच शरणार्थीको स्वेदेश फिर्तीका सम्बन्धमा डिपुटी कमिसनरले युएनएचसीआरले सदा शरनार्थीहरु ससम्मान स्वदेश फर्कून् भन्ने चाहेको र सधैं उनीहरुको चाहनाको सम्मान गर्ने बताए |
पत्रकारहरुको जिज्ञासाको जवाफमा उनले आफ्नो कार्यालयले झापा र मोरंगका स्थानीय बासिन्दाको बढ्दो मागलाई सम्बोधन गर्न छिट्टै समुदाय केन्द्रित विकास कार्यक्रम सुरु गर्ने बताए |
अहिलेसम्ममा युएनएचसीआरले विभिन्न आठ देशमा गरी जम्मा ६५,१९४ जना शरणार्थीहरुलाई पुनर्बास गराइसकेको छ जसमा अमेरिकाले मात्र ५४,७३१ जनालाई बासस्थान प्रदान गरेकोछ |
त्यसै गरी मे ३१ को तथ्यांकका अनुसार अष्ट्रेलियामा ३,४७६, क्यानाडामा ४,६६३, डेनमार्कमा ६१७, नेदरल्याण्डमा ३२४, नर्वेमा ५०७, न्यूजिल्याण्डमा ६५२ र बेलायतमा २२४ जना पुनर्बासित भइरहेका छन् |
अलेक्सान्डर आफ्नो चार दिने औपचारिक नेपाल भ्रमणको क्रममा मंगलबारदेखि नेपालमा थिए | नेपालमा रहंदा उनले उप-प्रधान तथा गृहमन्त्रि विजयकुमार गच्छदार साथै झापाका जिल्ला अधिकारीहरुसमेत भेट-वार्ता गरेका थिए |
