दमक प्रहरीले नेपाली यूवाहरुलाई भूटानी शरणार्थीका रुपमा दर्ता गरी पाश्चत्य मुलुक पठाउँछु भनी ठगी गर्ने एक जना स्थानीय महिलालाई पक्राउ गरेको छ |
पक्राउ पर्नेमा दमक १३ निवासी अजिता पौडेल रहेको प्रहरीले जनाएको छ | पौडेलले यसअघि नै १५ जना स्थानीय यूवालाई भूटानी शरणार्थीका रुपमा तेश्रो देश पुनर्वास गराउने सर्तमा मोटो रकम संकलन गरिसकेको जनाइएको छ |
“अनुसन्धानले देखाएको छ कि उनले प्रति व्यक्ति १५ लाख रुपैयाँ तिर्न लगाई कम्तिमा १५ जना यूवालाई ठगिसकेकी छिन्”, प्रहरी निरीक्षक नवीन कार्कीलाई उधृत गर्दै आइतबार एक जना स्थानीय बासीले संचार माध्यमसंग भनेका छन् |
उता आरोपित महिलाले भने आफू पक्राउ परेकोमा आश्चर्यचकित भएको जनाएकी छिन् | उनले भनेकी छिन् कि उनले ती यूवाहरुलाई विदेश पठाउन नसके रकम फिर्ता गर्ने जानकारी अघि नै दिइसकेकी छिन् |
पौडेलका अनुसार उनले ती यूवाहरुलाई संयुक्त राष्ट्र संघीय शरणार्थीसम्बन्धि उच्च आयोग र अन्तर्राष्ट्रीय आप्रबासी संगठनले अवलम्बन गर्ने आधारभूत अन्तर्वार्ता तरिकाका बारेमा सिकाउन एक महिनासम्म होटलमासमेत राखेकी छिन् |
आफूले ठगी गरेको स्वीकार्दै पौडेलले पत्रकारहरुसंग भनिन्, “म संलग्न रहेको कारोवारमा अरु धेरै एजेन्टहरु सक्रिय रुपमा लागेका छन् |” तथापि उनले आफ्नो भनाइलाई विस्तार गर्न इन्कार गरिन् |
